రోజు గడిచింది

వద్దన్నా వచ్చి గుద్దేస్తుంది.

బళ్ళో లెక్కల మాష్టారిలా
నిన్న రాని లెక్కనే
మళ్ళీ చేసుకురమ్మని
అదే పాత క్లాసు రూము బయటికి, గెంటేస్తుంది.

కుక్క మెడలో కట్టిన ఎముక లాగా
ఎంత గింజుకున్నా
జానెడు పొట్టని మించి ఇంచి కూడా కదలదు.

నిన్నటికీ నేటికీ మధ్య పెద్ద తేడా
వయసు ఒక రోజు పెరిగింది.

ఇంకా ఉన్నందుకు, ప్రతి రోజూ పావు కేజీ
అవమాన భారాన్ని నెత్తి మీద పెడుతూ
నెమ్మది నెమ్మదిగా కుంగదీస్తున్నట్టు
ఇప్పుడిప్పుడే తెలుస్తుంది.

ఇదంతా అనవసరమని తెలిసినా
అలవాటయిన రూటు మ్యాపునే
జిరాక్సు తీసి చేతిలో పెట్టి
'ఇంకొంచెం ముందుకెళ్ళు' అంటుంది.
రోజు గడిచిపోయింది.


'కినిగె పత్రిక' లో ప్రచురణ :http://patrika.kinige.com/?p=4802